SATUA BALI

I YUYU ENJEKIN KEBO

Ada Sang Prabu kaliwat wibuh tur kasub, maparab Sang Prabu Jaya Wikrama. Ida jumeneng agung di jagat Badrasakarana. Sang Prabu Jaya Wikrama kaliwat pradnyan waluya Sang Hyang Indra. Ida liu ngelah panjak muah kulawarga. Patihidane makejang pradnyan ngamong jagat. Para mantrinidane tusing ada malaksana momo muah cinging. Kawibawan Ida Sang Prabu, waluya teja Ida Sang Hyang Surya setate nyuluhin jagat. Ida tan mari madana-dana, teken para mantridane muah mapunia teken para sulinggihe. Yan kudang tiban suenidane nyeneng agung, laut ida katibenin pakeweh. Tetamanan Ida Sang Prabhu ane kasayangang pesan tur setate karesikin karusak polih irengan. Entik-entikane telah kabutbut oling irengan. Sang Prabu Jaya Wikrama dahat duka, tur prajani ngandikayang ngamatiang irengane ento. Ditu laut ida masesangi, nyen je ane nyidayang ngematiang irengan ento lakar kaicen kebo matanduk emas. Ditu laut ade yuyu ane sanggup ngamatiang irengan .

            Kacerita yuyune suba teked sig tongos irengane. Tepukine irengane sedek pules di carang kayune ngungkulin tukad. Yuyune menek ka punyan kayune nyujur irengan laut ngapit batisne. Irengan tengkejut lantas makecos, nanging lacur ulung katukade dalem laut mati. Yuyune kaicen kebo matanduk emas. Egar keneh yuyune nandan kebo, abana ka gooknyane. I yuyu mula tusing nawang pangunadika. Di kapan kebo nyidayang macelep ka gooke sripit? Kanti kenyel yuyune ngedeng kebone, apange sida macelep ka gookne. Kebone sayan rengas sawireh tusing nyidayang ka gookne. Gook yuyune uug kauyak olih I kebo. Bas makelone saling kedeng mawastu tundun yuyune bakat enjekina tambis ia mati. Ento mawinan kayang jani tampak batis kebone malaad di tundun yuyune.