contoh satua bali

I EMPAS PADEM KABATEK ANTUK GEDEG IPUNE RING I ASU

Kacrita wenten Empas lua muani,ane muani mawasta I Durbhudi,ane lua mawasta Ni Kcapa. Magenah ring tlaga sane mawasta taman Kumudawati. Lianan ring I Empas irika taler wenten angsa lua muani,angsa lua mawasta I Cakrenggi,sane muani mawasta I Cakrengga. Kasuen-suen I Empas makakasian sareng I Angsa.

I Empas buron belogan teken I Angsa. I Angsa sai-sai nuturin I Empas,I Empas masurudayu ring I Angsa. Nuju masan panes banteng,yeh tlagane nyat. Kala punika I Angsa lua muani pacang matilar ka tlagane sane wenten ring gunung Imawan. Tlagane punika mawasta tlaga Manasara,yehne ening pesan tan bina kadi taman Narmada,pasiraman Bhatara Indra. Toyane ten naenin nyat yadiastun masan panes ngentak.

I Angsa luh muani ngomong teken I Empas lua muani,ngorahang lakar matilar uli di tlagane ento. I Empas ngidih apang bareng-bareng matilar uli di tlagane taman Kumudawatine. Ngomong I Empas muani: ”Inggih jero sesuhunan titiang,yening jerone ledang ring pasikian titiang,titiang jagi ngiring jerone matilar”. Masaut I Angsa muani: “Nah yen keto idep caine ene ada daya melah. Ne ada kayu atugel,cai miwah nyai nangal basan tengahne. Deweke lakar ngeberang cai nyai ngungsi tlaga Manasarane. Padingehang pesan pabesen deweke ane mabuat pesan teken kauripan cai nyaine. Cai nyai apang satia teken semaya miwah setia mitra. Salantang jalan cai nyai tusing pesan dadi mamunyi,japi ada anak matakon tusing dadi sautin,yan bengkung tusing ngidepang,pedas cai nyai lakar sengkala meh-mehan bisa ngemasin mati”.